पती-पत्नीच्या वादातून आईने चुकून केल्या हल्ल्यात ११ महिन्यांच्या बालकाचा मृत्यू
दौंड प्रतिनिधी –
दौंड तालुक्यातील केडगाव परिसरात एक हृदयद्रावक घटना घडली आहे. पती-पत्नीमध्ये सुरू असलेल्या घरगुती वादाचे परिणिती इतके गंभीर झाले की, एका निष्पाप ११ महिन्यांच्या चिमुकल्याचा दुर्दैवी मृत्यू झाला.
ही घटना गुरुवारी सकाळी दहा वाजण्याच्या सुमारास घडली. केडगाव-आंबेगाव परिसरातील पुनर्वसन येथे वास्तव्यास असलेल्या नितीन मेंगावडे आणि त्यांची पत्नी पल्लवी यांच्यात घरगुती कारणावरून वाद सुरू होता. या वादात मध्यस्थी करण्यासाठी पल्लवीची जाऊ (भावजय) भाग्यश्री मेंगावडे आपल्या ११ महिन्यांच्या बाळासह तिथे आली होती. या चिमुकल्याचं नाव अवधूत मेंगावडे असं आहे.
वाद विकोपाला गेल्यावर संतप्त झालेल्या पल्लवीने देवीसमोरील त्रिशूळ उचलून नितीनवर हल्ला करण्याचा प्रयत्न केला. मात्र हल्ला चुकून झाला आणि त्रिशूळ थेट भाग्यश्रीच्या कुशीत असलेल्या चिमुकल्या अवधूतच्या छातीत घुसला. त्या घटनेनंतर परिसरात हळहळ व्यक्त केली जात आहे.
तत्काळ जखमी अवस्थेत अवधूतला केडगाव येथील खासगी रुग्णालयात नेण्यात आले. प्राथमिक उपचारानंतर त्याला लोणी येथील मोठ्या रुग्णालयात हलवण्यात आले. मात्र डॉक्टरांनी त्याला मृत घोषित केलं.
अवधूत हा भाग्यश्रीचा एकुलता एक मुलगा होता. त्याला दोन मुलींपाठोपाठ जन्माला आलेला एकमेव मुलगा असल्याने कुटुंबीयांवर दुःखाचा डोंगर कोसळला आहे. या घटनेनंतर भाग्यश्री मेंगावडे यांच्या फिर्यादीवरून पल्लवी आणि नितीन मेंगावडे यांच्याविरुद्ध गुन्हा दाखल करण्यात आला असून पुढील चौकशी सुरू आहे.
